الجمعة 24/11 خنقة بسبب مشيرة وماتش ملغي

مع ان هي عارفة هي واحشاني اد اية ومع انها برضة عارفة ان ده هيكون احسن يوم ممكن اشوفها فيه واقضية كله جنبها _ علشان البنات كلهم دينا وبسنت والباقيين النهارده في العاشر_ وبالتالي كنت هروح اقعد معاها هي طول والوقت.. علي الرغم من كل ده لقيتها بتتصل بيا حوالي الساعة اربعة كده وبتقولي خليك متجيش.. برضة مع ان هي عارفة اني كده كده نازل علشان رايح الماتش.. انا مش لاقي حاجة اقولها علي الموقف الحلو ده .. من الاخر انا مخنوووووووووووووق

الماتش بأه لسه اللعيبة هتنزل علشان الماتش يبدا قام عمود نور ضرب شويه والتاني وراه وهوووب الاستاد كله باه ضلمة... حاجة تقرف بلد معفنة.. رجعت قرفان كلمت مشيرة هي كمان قرفانة علشان الفرح اتاجل وبقي في شهر ديسمبر قولتلها عادي متقرفيش نفسك انزلي برضة الخميس والجمعة زي ما كنتي مخططة.. ماخدتش منها رد هي ناوية تعمل ايه.

انا زهأن وعارف ان مشيرة كمان تعبانة ومتغيرة بس هي مش عاوزة تتكلم مش عاوزة تقولي ايه اللي تاعبها ..انا حاسس اننا بنبعد مش عارف فيه ايه.. هي صعبانة عليا اوي ساعات مبعرفش انام من كتير التفكير في اللي هي فيه..نفسي اريحها بس مش عارف وهي كمان مش مدياني فرصة .......

اكتر حاجة بتجنني هي بعدنا عن بعض ده ..بقعد اسال نفسي يا تري هي بتفكر في ايه دلواتي طب هي مبسوطة ولا زعلانة مرتاحة ولا في حاجة تعباها..كل ما اتخيلها وهي نايمة لوحدها في الضلمة والبرد في مكان غريب لا هو بيتها ولا بيتنا ببقي هتجنن ازااااااااااااااااااااااي.. ازاي هي مستحمله ده كله وازاي انا سايبها كده ونايم ومرتاح علي سريري.. ازاي الملاك الصغير الرقيق ده بيستحمل كل ده ..ازاي البيبي بتاعي اللي متعرفش اي حاجة في الدنيا عايشة في الظروف دي ...انا حسيت كده اوي النهارده بالذات من كلامها عن البيت وان كلهم موجودين ولمتهم مع بعض هناك واد ايه هي محتاجة الجو ده ومفتقداه دلواتي ..حسيت ان نفسها تسيب الدنيا كلها والقرف اللي هي فيه ده كله وتروحلهم وتبقي معاهم في اللحظة دي.... سامحيني يا مشيرة سامحيني علي كل دقيقة انتي بتعاني فيها و اكون انا السبب فيها..


بحبك يا مشيرة ..بحبك بحبك بحبك بحبك بحبك

بحبك اكتر من اي حاجة في الدنيا دي.. و لو هعيش في الدنيا دي لسبب يبقي علشان اسعدك واعوضك عن كل اللي فات .

Someday, somehow

gonna make it allright but not right now

I know you're wondering when

B U T

You're the only one who knows that

بحبك يا مشيرة

لقيت قلبي لقيت روحي

بتندهالك

خيال عقلي ونور عيني

بيشتقالك

*******

حاولت اهرب لقيت حبك

لقيت حبك محاوطني

وقلت ابعد لقيت قربك

لقيت قربك مقاسمني

اخاف قربك يزيد حبك

يا ويل حبك

يا خوف قلبي من نار بعدك

يا نار بعدك

************

رأيت طيفك رأيت سحرك

رأيت سحرك يشاورلي

نسيت نفسي وكان نفسي

وكان نفسي تقربلي

علياء- ولا علي بالي 1995

------------------------------------------------

Love in a woman's heart

I wanna have the whole and not a part

Strange that this feeling grows more and more

Cause I've never loved someone like Y O U before

scooter-week end 2003

-------------------------------------------------------

فيها ايه خايف يقول

وانا مش هقول

كل اللي حاسة انا بيه

علي ايه كل الغرام

حتي الكلام

باين اهو في عينيه

ده حنيني وشوقي ليه

دايما يزيد

من اد ايه بداريه

******

يا غرام انا لو حكيت عن شوقي ليه

ميكفنيش ايام

وسنين عمري في هواه

فاتت هوا

عدت ولا الاحلام

يا حرام باين عليه

بدمعة عنيه

بيداري احلي غرام

مريام - واحشيني ايه 2005

------------------------------------

سنين تفوت وتمر

ويجري بيا العمر

لا عدت حاسس لا عدت شايف في الدنيا غيرك

اروح بعيد ارحل اغيب

ارجع واجيلك

منير-أما الهوا 2005

------------------------------------

ابكي لو في عيني دموع

اضحكي لما اكون فرحان

احضينيني لو الغرام ممنوع

حسي بيا وبعنيا

كوني شوق وحنان

محتاجليك تبقي جنبي

تبقي قلبي تبقي عمري

تبقي روح الروح

انا عايزك تبقي ليا

تبقي فيا

اوعي ثانية

من حياتنا تروح

تبقي صوتي لما اغني

تبقي عنيي لما اشوف

تبقي احساس الامان

اللي عمره ما يبقي خوف

*+*+*+*+*+*+*+*+*

مــــشــــيـــرة

احلي من اجمل حلم حلمته

اكتر من كل اللي اتمنيته

MY HEAVEN SENT

MY INNOCENT LOVE

MY ONE & ONLY

MY PURE ANGEL

M O S H E E R A

*+*+*+*+*+*+*+*+*

التلات 14/11/06 اكتوبر والهرم وانتر فيو وعربيه ماتريكس وسلينترو وسمك مشوي و في الاخر برضة حشو ضرس

اول حاجة قولت بلاش اصحي ميشا بدري خليها هي نايمة وانجز انا شويه مشاوير
بدل ما اتعبها معايا.. صحيت علي سبعة كده حلقت ولبست وروحت صورت البطاقة علشان اصرف الشيك ونزلت علي البنك اللي في روكسي ماختش 5 دقايق وكنت مخلص مش زي البنك الوسخ اللي عندنا في الحدايق ده , مع ان الاتنين البنك الاهلي..كانت الساعة بأت حوالي تسعة الا ربع قولت برضة لسه بدري بلاش اصحي حبيبتي دلواتي انا اروح احسن احط الفلوس في حسابي بدل ما انا ماشي بالماستر وهي فاضية كده وكمان علشان لو روحنا النايل بكين ابقي ادفع بيها.. وانا بتمشي من عند البنك لحد الس اي بي عند نادي هليوبليس كده لقيت ميشا بترن عليا ..اتأريها هي صاحية من الساعة سبعة هي كمان بس مكانتش عاوزة تصحيني ..فقولتلها طيب تعاليلي علي البنك يا حبيبتي علي اساس اننا نكسب وقت... روحت علي البنك وحطيت الفلوس في الحساب بس قولت ايه بلاش احطهم كلهم خللي معايا 400 احتياطي احسن.. طلعت برة اجرب الماستر في الماكنة القيه بيدلي الرصيد 50 قرش .. قولت استني شويه يمكن يكونونا لسه منزلوش.. وانا واقف قمت كلمت ميشا علي اساس اشوف هي اتاخرت ليها فلقيتها بتقولي انا خارجة اهو من باب الدار لسه..طب انا هقابلك في السكة يا حبيبتي بس انتي امشي من الطريق اللي انتي عارفاه اللي هو من جنب الكشك اللي علي اول الشارع ..ماشي ماشي ..اوكي اوكي..امشي امشي لحد الكشك مفيش حاجة لحد الدار مفيش حاجة البت راحت فين احسن تكون تاهت ..كلمتها
-ايوه يا مشمش انتي فين
-اناعند البنك يا حبيبي دلواتي
-نو كومنت
طبعا هي قامت جت من طريق غير اللي احنا اتفقنا علية او للدقة اكتر اللي هي بنفسها اختارتة
طبعا انا كنت علي اخري من الي حصل ده بس حاولت ما انفجرش فيها علي اد ما اقدر.. لكن للاسف برضة هي زعلت من كلامي.. قولت احاول تاني في الماستر الزفت دي يمكن القي الفلوس برضة مفيش فايده دخلت للراجل جوه اساله هي الفلوس هتنزل علي ال ايه تي ام امتي قالي دي بتاخدلها يوم علشان ده حساب توفير مش جاري.. قولت طيب كويس اني محطتش الفلوس كلها والا كنا هنشحت باقي اليوم.. طلعنا من ادام البنك علي موقف الباص بتاع 6 اكتوبر اللي في احمد حلمي وعلي ما اتخانقت شويه مع الراجل المتخلف سواق التاكسي بندخل الموقف لقينا الباص لسة طالع..قعدت اشتم في الحيوان سواق التاكسي اللي عطلنا. وقفنا مستنين بتاع نص ساعة بحالها علي ما الاتوبيس اللي بعده جه ركبنا وكان الاتوبيس ريحتة معفنة طبعاكاننا قاعدين في قلب البوتي.. وكمان السواق ابن الحلوة قرر انا هيمشي من الهرم مش من المحور يعني ضعف الوقت تقريبا.. وانا كنت عاوز الحق الراجل قبل ما يمشي..... اتصورنا شويه في الباص وميشا قلعت الجيبه اللي انا كنت مخنوق منها من اول النهار اصلا وفضلت بالبنطلون اللي تحتها بس كانت المشكله بأه هنودي الزفتة الجيبة دي فين انا اقترحت اننا نرميها ونبقي ارتحنا منها ..بس هي مرضيتش
- مش انت اللي جايبها
- كنت غبي
المهم قدرنا بمعجزة كده نحشرها جوه شنطة ميشا.. وفضل الباص ماشي ماشي لحد ما وصل الهرم اللي كان دي اول مرة ميشا تشوفه فيها فقولنا نصورة هو كمان بس طبعا مطلعش اي حاجة من ازاز الباص....................انا زهئت هكمل بعدين باه

2يوم الاحد5/11/2006 جنازة و كورة وحشو سنان وفراخ مظلظطة

المهم بأه كان حظي حلو ووصلت رمسيس علي تلاته وربع كده لقيت مشمشتي حبيبتي مستنيه في مكانها المفضل طبعا اللي هو جامع الفتح..كنا احنا الاتنين هنموت من الجوع فقولنا ناكل في الحدايق احسن علشان نبقي جنب الدكتور ومنضيعش اكل كتير .. واكل في الحدايق يبقي حاجة من الاتنين يا اما مومن يا اما كيه اف سي وللاسف اختارنا الزفت التاني ده علي اساس انه اقرب للدكتور.. دخلنا طلبنا وبعدين روحت انا وديت الشنطة اللي كان في هدوم مشمش وجبتلها كمان الجاكت بتاعي علشان حبيبتي كانت بردانة-- علي فكرة يمكن يكون عدي علي الكلام ده اكتر من اسبوعين اهو بس لسة كل ما بلبس الجاكت بشم ريحتك فيه يا حبيبه قلبي-- علي ما روحت ورجعت كانت فاتت اكتر من نص ساعة قولت زمانها خلصت اكل وقاعدة زهأنة دلواتي .. روحت لقيتهم اصلا لسه مطلعوش الاوردر ولاد ال*****..المهم جه الاكل اللي هو كان عبارة عن 3 قطع فراخ بعضمها ودمها وحاجة كده بتزليط جواها ده اللي هو دينر بوكس وساندوتش كده اد رغيف الكيزر الصغير ده وشويه بطاطس معفنين والمفروض ان الكلام ده كده بخمسين جنيه !!!!! المهم اكلنا الشت ده واحنا مستسلمين علي اساس انا الخيار الوحيد المطروح , وقامت البت غسلت سنانها بالفرشاه والمعجون في الحمام=افتكاسة جديده= وطلعانة علي الدكتور ابن المجنون اللي فشخلي بؤي قبل كده هو وبنتة المجنونه دفعنا الكشف واستيننا شويه علي ما جه ودخلنا علي خمسة ونص كده.. يادوب ضرب بالبتاع اللي بيزن ده ضربتين تلاته جوة بؤ ميشا من غير بنج طبعا=فك هيم = وحشالها حشو مؤقت ولهف علي الليله
دي كده 80 جنية ده غير الكشف طبعا.. نزلنا من عنده جري روحت انا غيرت ولبست تي شيرت الزمالك الميلان بتاعي وجبت لميشا التي شيرت الاديداس علي اساس انه اوسع شويه وركبنا تاكسي علي الاستاد قطعنا التذاكر ودخلنا .. اه بس فيه حاجة حصلت كده واحنا داخلين لقيت واحد من العالم ولاد الوسخة اللي بيوقفوهم ادام الاستاد المخبرين اللي بشنبات وكلهم اسمهم فرج وسيد دول لقيته بيقول يعني بـ ** امة اللي معاه حريم يجي علي جنب في الطابور ده يا حضرات علي اساس انهم يدخلوا بسرعة يعني لان الطابور اللي كنا واقفين فيه كان طويل شويه وبيتحرك براحة.. طبعا ولاني ضد اي فصل او تمييز في المعاملة علي اي اساس نفضت لامه وفضلنا واقفين عادي انا وميشا .فلقيتة بيقولي " تعال يا استاذ في الطابور ده انا اللي بقولك" كنت عاوز اقول ساعتها يا اخي ** امك وهو انت مين يعني..بس قولتله يا عم احنا عاوزين نقف في الصف ده احنا حريين

المهم دخلنا الاستاد وقعدنا وكالعاده برضة في الحركات الوسخة بتاعتهم كانوا قافلين الباب اللي بين الدرجة التانية والتالتة مع انهم بنفس السعر.. والتالتة طبعا مفهاش حمام للبنات والجو يومها كان بررررررررد .. بس قولنا برضة مش مشكله اهم ساعتين وهيعدوا وخلاص ..بدا الماتش وكان الزمالك زي الزفت طبعا مفيش شويه ولبسنا الجون الاولاني بسبب الزفت اللي اسمة طارق السيد.. خلص الشوط الاولاني وطلعنا ندور علي حمام بره علشان العملية كانت علي اخرها معانا احنا الاتنين ملقيناش غير حمام معفن الكلاب مترضاش تستخدمة.. قولنا ننفض لحوار الحمام ده ونطلع نتصور احنا الاتنين احسن طلعنا فوق في ال ابر ستاند اتصورنا شويه وطبعا كان الهوا فوق اجمد والجو برد جدا فنزلنا واحنا مزنوئين اكتر..لما لقيت العمليه كده قولت لازم اتصرف احسن البت يحصلها حاجة فروحنا للشخص اللي كانوا واقف علي البوابه وسالتة اذا كان فيه حمام في الناحية التانية ولا لآ قالي اه

فيه وقام عدانا !!!!!! مع انه كان فيه واحد قبلنا قعد يتحايل عليه انه يعدية ومكنش راضي== ناس بنت ****= عدينا ودخلنا الحمام اللي كان المره دي ( حلو اوي وكله مرايات) حسب كلام مشمشتي اللي قعدت جوه حوالي ربع ساعة معرفش بتعمل ايه ده كله ومكنش فيا دماغ اني اسالها لان الماتش كان علي اخرة والزمالك ضاغط بكل قوته علشان يتعادل.. دخلنا قعدنا ومفيش دقايق كان عمرو زكي حاطط التعادل....................................................... وخلص الماتش علي كده!!!

===== F U C K =====

يوم الاحد5/11/2006 جنازة و كورة وحشو سنان وفراخ مظلظطة

هو اليوم ده مكنش النهارده بس حبيت اكتبة قبل مانساه.. يوم الاحد 5/11 بالظبط كان بألنا كده 30يوم مشفناش بعض من يوم 6 اكتوبر يعني شهر بحاله واحنا محرومين من بعض(جايبين اخرنا يعني) مع اننا كنا قبلها بكام يوم متخانقين خناقة محترمة بسبب الزفتة دينا هي ماكنتش خناقة يعني بالمعني الحرفي لاننا عمرنا ما كان فيه بينا خناقات بس هي مشمشة كانت زعلانه شويه علشان وصلنا دينا انا وكراكيرو ومقعدتش معاها كتير.. او علشان دينا قعدت تنطط عليهم بكلام اهبل كده ..مش فاهم كان ايه السبب بالظبط المهم ان مشمشة كانت زعلانه وخلاص وبتحملني انا ذنب الكلام اللي دينا قالته وكالعاده كانت هي مندفعة جدا وانفجرت فيا وكنت انا _كالعاده برضة_ بارد جدا .. علي اساس اني مش شايف اني غلطت.. بس عدينا الموقف ده بسرعة كعادتنا دايما مع بعض مش لاي سبب غير لاننا بنحب بعض ومش ممكن حد فينا ينام وهو زعلان من التاني

نرجع بأه لليوم بتاعنا اللي بدا كيوم عادي في الشغل في العمارة الصبح علي اساس اني هخلص في معادي الساعة اتنين ونص تلاته بعدين اروح اجيب مشمشة من محطة القطر ونكمل اليوم مع بعض ..مفيش بعد ما روحت بساعة لقيت م/هاني صبحي داخل علينا وبيقول ده ابو المهندس هاني مراد مات الفجر ..انا سمعت كده قولت اخخخخخخ ده كده هيبقي فيها عزاء بالليل وحورات طب وبعدين والبت الغلبانة اللي جايه دي هوديها فين ومعادنا مع دكتور السنان وماتش الزمالك و...و... وكل الحاجات اللي كنا مخططينلها كده اليوم اتفشخ مش باظ ..فكلمت مشيرة وقولتلها متنزليش باه من عندك غير لما اقولك يا حبيبيتي وكانت هي خلاص لبست وبتستعد للنزول .. المهم رسيت العمليه ان مفيش عزاء في اليوم ده بس لازم نصلي عليه في مصطفي محمود في المهندسين بعد العصر يعني فيها كده لتلاتة .. قولت مش مشكله لما اكلم البت اقولها تظبط نفسها انها تبقي هنا علي اربعة كده يا دوب علي ما اوصل من المهندسين لرمسيس..جيت اكلمها لقيتها بأه عملت ايه الحلوة نزلت من ساعة انا ما قفلت معاها من اول مرة وبتقولي ده انا خلاص القطر داخل علي رمسيس بعد ساعة .. يعني علي حوالي واحده ونص هتبقي هنا يعني فيه ساعتين ونص هتقعدهم في الشارع ..طبعا حبست في نفسي ومرضتش اعلق..واتفقنا انها لما توصل انها هتستني في جامع الفتح زي المرة اللي فاتت تصلي يعني وتقعد تستني بس طبعا قبل ما تقفل معايا كان لازم تديني مسمار (مش عاوز اقول حاجة تانية خليه مسمار احسن) وتقولي ايه بس اعمل حسابك لو مجتليش علي اربعة هروح علي الدار
نفضت انا للحورات دي كلها ومفكرتش فيها كتير وقمت راكب مع المهندس هاني صبحي وطلعنا علي الجامع علشان نصلي علي الراجل الصراحة الدنيا كانت برد وانا مكنتش متوضي وكنت اصلا بألي بتاع كتيييير كده مش عارف اد ايه مصلتش ... فقولت اي حاجة بأه وقمت اديتها صلاة علي الراجل زي ما انا كده بلا وضوء بلا بتاع
خلصنا الحوار ده لقيتهم بيقولوا يلا بأه نطلع الترب مع الراجل ..الترب اللي هي في مدينة نصر يعني .. انا بصتلهم كده وكنت عاوز اقولهم***** بس مرضتش ..لان الساعة كانت بأت تلاتة و ربع تقريبا..فركبت تاكسي علي رمسيس ونفضتلهم كلهم .. انا تعبت كده النهاردة وشكلي هكمل بكره

اول يوم لينا (ليا) في البلوج

اللي طلعها في دماغي اني اعمل بلوج علشان كنت قاعد قرفااااااااااااان من اللي حصل في الموقع النهارده والزفت اللي اسمة مهندس الفريد والحيوان اللي اسمة ياسر .. المهم كنت قاعد بتفرج علي البلوج بتاع وائل عباس ونفسي اتسدت اكتر من اللي شفته.. ففكرت كده وقولت طب ما اعملي بلوج انا كمان اطلع فيه الشت بتاعي انا كمان ..طبعا كان اختيار الاسم هو اسهل حاجة لاني مش معقول هعمل باسمي انا بس لازم يبقي فيه اسم مشمشة حبيبتي ويكون اسمها هو اللي في الاول كمان.. هي صحيح مبتعرفش تتستخدم النت لسه بس اكيد هبقي اعلمها في يوم وتدخل تكتب هي كمان.. علي الرغم من اني سميت البلوج بالاسم اللي بحب اسميها بيه بيني وبين نفسي (ميشا) واللي لسه مقولتلهاش عليه خالص علشان متضحكش عليا